உள் மனசை ஆடவிட்ட உதயன் நாயகி விஜய்யுடன் இணைகிறாராம்!

கடந்த ஆட்சியில் வந்திருந்தால் கதையே வேறு. ஆட்சி மாறியதால் முன்னாள் முதல்வரின் பேரன் அருள்நிதி நடித்த உதயன் திரைப்படம், தியேட்டர்களில் தள்ளாட்டம் போட்டுக் கொண்டிருக்கிறது. பல தியேட்டர்களில் படத்தையே தூக்கிவிட்டார்கள். இத்தனைக்கும் ஒரு கமர்ஷியல் படத்திற்குண்டான அத்தனை அசத்தல்களையும் உள்ளடக்கிய படம்தான் அது.

இத்துப்போன கிளையா இருந்தாலும், இலந்தை பழம் ருசி என்பது போல படம் ஓடாவிட்டாலும், இப்படத்தின் நாயகியான பிரணதிதாவை பார்த்து பெருமூச்செரிந்தது திரையுலகம். மலைத் தேனையும் மைதா மாவையும் பிசைந்து செய்த மாதிரி இருக்கிறாரே என்றும், அந்த சிரிப்பை பார்த்துகிட்டே சீமெண்ணையை கூட குடிக்கலாம் என்றும் வசனம் பேசியே வளைந்து நெளிந்தது.

அதற்குள் ரிசர்வேஷன் கூப்பனோடு நின்றார்கள் சில இயக்குனர்கள். ஆனால் இவர்களில் டாப் யாரோ, அவர் வந்தால்தான் கால்ஷீட் என்று காத்திருந்தார் பிரணதிதா. அதற்கான பலனும் கிடைத்திருக்கிறது. ஏ.ஆர்.முருகதாஸ்-விஜய் இணையும் படத்தில் பிரணதிதாவே ஹீரோயினாக இருக்கலாம்!