'தலைவா'வுக்கு பயந்து தெறித்து ஓடிய படங்கள்

சிறிய பட்ஜெட், பெரிய பட்ஜெட் என சுமார் 30 படங்கள் ஆகஸ்ட் மாதம் ரிலீசாகக் காத்திருந்தன. ஆனால் விஜய் நடித்த தலைவா படம் ஆகஸ்ட் 9 ஆம் தேதி ரிலீசாகும் என்று அறிவிக்கப்பட்டதால், இந்தப் படங்கள் அனைத்தும் ரிலீஸ் தேதியை அறிவிக்க முடியாமல் திணறிக் கொண்டிருந்தன.
இந்நிலையில் தான் தலைவா படம் அறிவித்த நாளில் ரிலீசாகாமல் போனது. இதனைப் பயன்படுத்திக் கொண்டு பரத் நடித்த 555 படம் ஆகஸ்ட் 10 ஆம் தேதி ரிலீசானது. அதன் பின்னர் ஆதலால் காதல் செய்வீர் படம் ஆகஸ்ட் 15 ஆம் தேதி ரிலீசானது. அன்றைய தினம் வரை தலைவா ரிலீசாவதற்கான சூழல்கள் எதுவும் தமிழ்நாட்டில் இல்லை. எனவே தேசிங்குராஜா, பொன்மாலை பொழுது, தங்க மீன்கள், நெடுஞ்சாலை, மாதவனும் மலர்விழியும், கோப்பெருந்தேவி, அடித்தளம், நேற்று இன்று உட்பட நிறைய படங்கள் ஆகஸ்ட் 23 ஆம் தேதி ரிலீசாகும் என்று கூறினார்கள்.
ஆனால் தலைவா படம் அனைத்து விதமான தடைகளையும் தாண்டி நேற்று (ஆகஸ்ட் 20) ரிலீசானது. குறைந்தது 2 வாரங்களுக்காவது தலைவா அலை வீசும் எனபதால் தேசிங்கு ராஜா தவிர அனைத்து படங்களும் பின்வாங்கி இருக்கின்றன. தேசிங்கு ராஜா படத்துக்கு 350க்கும் மேற்பட்ட திரையரங்குகளை ஏற்கனவே புக் செய்து விட்டதால், அந்தப் படம் அறிவித்தபடி ரிலீசாகிறது. மற்ற படங்கள் எல்லாம் தலைவாவுக்கு பயந்து தெறித்து ஓடி விட்டன.